全港首間地盤風RC鏟泥遙控車主題遊戲館 x 尋寶換禮物

最近爸爸上網睇到介紹，有間以鏟泥遙控車做主題嘅cafe，可以一嘗地盤佬咁話。

不過，個人覺得呢到唔可以話係Cafe，當日到店店內只有提供紙包/樽裝飲品及玩遙控車嘅遊戲店。有啲似機舖咁，但就純玩鏟泥遙控車。

場地設計：沙池+鏟泥車=童心大爆發

沙地地盤場景真係超吸引，一睇到入面有十幾部細細部嘅鏟泥車，就好想落場試下玩嘅衝動! 可能係童年冇得玩呢啲，而家終於有機會一嘗做地盤佬嘅心願!

沙池唔係普通沙咁簡單，入面仲有幾隻色嘅金幣散落其中。喺限時內用遙控鏟泥車將金幣掘出，集齊唔同顏色就可以換禮物，成個過程都好刺激又有挑戰性。

^ 禮物櫃

我本身對遙控車冇乜經驗，但店員好有耐性，佢會逐步教我哋點操作。教識後，先開始計時玩。由起初嘗試控制方向，到後來成功掘出第一枚金幣，成個過程都令人好有滿足感!

最開心係可以同小朋友一齊挑戰，睇下邊個掘得最多！

收費方面: (確實收費請參考英雄傳官方IG)
星期一至四:
一人一車$60/30分鐘 (包1份飲品)
一人一車$110/1小時 (包1份飲品)

學生優惠:
一人一車$90/1小時 (頭30分鐘$60/30分鐘，之後30分鐘半價，包1份飲品)
一家三口$180/1小時（包3份飲品)及2車
*注: 一家三口可加$50一部兒童車 (最新升級遙控)
*先租先得，場內只有2部!

星期五、六、日及公眾假期:
一人一車$80/30分鐘 (包1份飲品)
一家三口$180/30分鐘 (包3份飲品)及2車

*注: 一家三口可加$50一部兒童車 (最新升級遙控)
*先租先得，場內只有2部!

店內提供的飲品，要有飲品券先可以換領~

【英雄傳】

地址: 九龍長沙灣深水埗元州街152號

營業時間:
星期一至星期四: 中午12:00至晚上10:30
星期五/六/日/公眾假期: 中午12:00至晚上11:30

-----------------------------------------------------

我哋發掘最新、至好玩嘅好去處呀。