2018年12月29日 星期六

【放電好去處】全新!屯門公園「屯門公園共融遊樂場」x超好玩x超放電


今次介紹嘅呢個公園,係2018年12月最萬眾觸目、最期待、香港最正嘅共融遊樂場!!
亦因為佢係萬眾觸目、個個都超期待要去玩,所以公園日日都經常爆滿。


呢到又有水玩、又有沙玩,亦係全香港最新穎嘅設計。顏色又色彩繽紛,大人細路睇見都開心。


共融遊樂場仲分為「南」、「北」兩個部分,合共七個遊玩主題區,北面係以水中荷花為主題,提供玩水區、高高低低嘅小山丘區、彈床、音樂小玩意如敲擊樂器和鼓等。而南面就以爬蟲動物為主題,設有唔同高度、唔同款式嘅攀爬架、滑梯。仲有沙池玩「掘蛋」,場內最吸引嘅當口唔少得鞦韆區,因為除咗有傳統鞦韆之外,仲有三款好特別嘅韆鞦,包括搖籃型鞦韆、座椅型鞦韆及親子型。

北面遊樂區
「光影荷花」可以控制花灑裝置嘅水流同流速,另外仲有嬉水平台。不過踏入冬天,對玩水嘅意慾大大降低咗。要等天氣回暖、熱返啲先再玩過。


「山丘地帶」高高低低嘅小山丘,可以訓練小朋友身手。


今次亦係第一次見香港嘅公園有戶外嘅免費彈床玩~


南面遊樂區
「爬上爬樂」呢個設施絕對係挑戰膽量、訓練手腳肌肉嘅遊戲組。7米高嘅攀爬塔,設有兩條高低、款式不同嘅滑梯組。



而成個攀爬塔大部份樓梯都係以繩網作為樓梯,訓練小朋友膽量及手腳肌肉。



超刺激5米高吊橋

攀爬塔設有兩組滑梯,一組水管滑梯及紅色膠滑梯。
必玩水管滑梯

雖然係膠滑梯,但係超高速~~




除咗水管滑梯之外,公園入面仲有另外嘅特式滑梯。


不鏽鋼滑梯,滑梯唔算好滑,所以都好安全。


滾筒式滑梯,就算係傷健嘅小朋友,都可以坐住輪椅體驗玩滑梯嘅樂趣。


鞦韆區,引入三款特別嘅鞦韆。


座椅型嘅鞦韆,仲附有安全帶。


親子型嘅鞦韆


搖籃型嘅鞦韆



當然唔少得傳統嘅鞦韆啦


氹氹轉嘅遊戲,呢款亦係為傷健小朋友而設,佢哋可以坐住輪椅玩氹氹轉。


氹氹轉繩網陣


沙池及沙台,如果想玩沙記得要自備玩沙工具,仲有拖鞋呀~


訓練身手嘅繩網陣


色彩繽紛嘅卡通牆,有幾組旋轉遊戲~


充滿傻氣~超可愛呀~



仲有與音樂有關嘅遊戲版。

公園嘅設計除咗好玩之外,亦為傷健小朋友多加一點關愛。
去玩嘅時候,記得要互相關愛,因為香港根本無一個合適嘅公園俾傷健小朋友去玩。


聽說每日都好多人,所以想玩得舒舒服服唯有早少少去公園啦…
當日去到公園,公園都好乾淨,仲不時見到有清潔工人掃地、清潔。
不過,呢到係公眾地方,記得玩完之後要帶走自己嘅隨身物品同埋垃圾呀。


放假我哋還是喜歡帶小朋友四圍去玩,出去遊玩、見識。


屯門公園兒童遊樂場 (近友愛村)
逢星期一7am - 1pm暫停開放,(進行場地保養工作)。
**如星期一為公眾假期,保養工作將順延至下一個工作天進行

--------------------------------------------------

歡迎聯絡我&和牛B: chungying56@hotmail.com
Facebook專頁和牛B嘅成長專頁

Instagramwagyubmami


            
--------------------------------------------------
姊妹合作**Precious M accessories**
利用剩餘、過期的母乳,自己動手做屬於自己的首飾,母乳媽媽給自己的小獎勵,做法簡單自己都做得到。

2018年12月18日 星期二

【簡易食譜】手殘都做到「迷你牛角酥」。輕食早餐、茶點

天氣開始凍,每朝早餐我都想整一啲暖笠笠、熱辣辣嘅食物俾和牛B。
但天氣凍,自自然然都唔想早起。
所以,唯有做一啲準備時間較短嘅食物就似乎比較適合,要返工又要帶和牛B返學嘅我。

牛角酥合乎快、靚、正嘅效果。


準備材料都好簡單,現成嘅酥皮。其餘食材相信大家屋企都會有,蛋、糖漿/蜜糖。

材料:
1.酥皮一塊 (我呢塊大概15cm x 15cm)
2.蛋一隻 (蛋漿)
3.糖漿/蜜糖

做法:
1.酥皮從冰上拎出嚟解凍 (軟身就可以了)

2.將酥皮砌成4塊三角形

3.用麵棍碌平

4.喺三角形部份嘅中間位置剪開

5.從底部開始卷起 (如果想甜啲,可以搽上糖漿/蜜糖)

6.喺牛角酥上掃上蛋漿,再掃上糖漿/ 蜜糖

7.放入爐焗160℃,焗20分鐘

8.完成!

酥軟可口,自己整仲新鮮~

我只係喺牛角酥面掃上蜜糖,唔會好甜,如果想甜少少就喺卷嘅時候搽埋蜜糖,咁就由內到外都會有甜味。

*溫韾提示*
由於每個焗爐的新舊型號關係,爐溫都會有差異。所以喺烤焗時,建議定時留意牛角酥嘅情況,以免焗燶。

我的幼兒食譜分享

--------------------------------------------------

歡迎聯絡我&和牛B: chungying56@hotmail.com
Facebook專頁和牛B嘅成長專頁

Instagramwagyubmami


            
--------------------------------------------------
姊妹合作**Precious M accessories**
利用剩餘、過期的母乳,自己動手做屬於自己的首飾,母乳媽媽給自己的小獎勵,做法簡單自己都做得到。