2018年5月9日 星期三

【母親節快樂】成為母親後,才知道母親多偉大

首先好多謝爸爸媽媽俾咗一個大家庭我,有哥哥姐姐,好有家庭溫暖。
由於我係屋企嘅孻女嚟,所以由細到大我都好痴我媽咪,亦可以話集萬千寵愛在一身。

結婚前,我仲對婚姻充滿好多個憧憬。
雖然我係有好多憧憬,但其實我一早知道童話式嘅愛情故事,只有電視劇先會有。


婚後,更加覺得做女係幾咁好,正所謂在家千日好。
著過嘅衫會自動入櫃、起身有早餐食、放工返去又有飯食,有時仲有飯盒帶添。

而家生埋和牛B,就更加深深體會到母愛係幾咁偉大。
先唔好講9個月左右嘅孕期,肥腫難分,半夜腳抽筋。
入到產房仲要打針、插尿喉放尿,仲要陣痛咗十幾粒鐘先至生得出BB。


為咗照顧小朋友瞓覺時間少咗、無咗好多私人時間。


每逢假期我會同和牛B四圍去玩,以前就會約閨蜜行街食飯,而家就經常去Playhouse撲波波池。

到大家去追梗子華神同五月天嘅時候,我就去追梗Peppa Pig音樂會。


每當去餐廳食嘢,為咗啱和牛B口味同佢一齊食,往往都會遷就和牛B,自己想食嘅嘢(例如沙嗲牛肉麵/ 辣嘢) 唯有望到當食咗啦。

其實講到媽媽嘅偉大,上面嘅都係小兒科。


當小朋友突然間嘔嘅時候,媽媽總係會二話不說伸出手掌接住啲嘔吐物。
我試過夜晚,和牛B瞓瞓下喊,正當我抱佢入懷嘅時候,佢對住我嘔,嘔到我一身都係。
而佢係會繼續喊…嗰一刻我都好想喊,我都好想嘔…


遇上佢哋偏食嘅時間,我唯有嘗試教導佢,樣樣都要食,所以我自己明明唔食嘅嘢,我都會放入口再話佢知「媽咪都唔偏食,我樣樣都食」。

生兒育女唔好話好簡單,係嘅生係比養容易得多,教養係一個難題。


所以我好感謝父母養到我咁大,教我唔少做人嘅道理,至少我唔係一個壞人。
亦好感謝媽媽平日幫我照顧和牛B,和牛B而家已經3歲啦。
呢三年嚟辛苦和牛婆婆了,和牛婆婆照顧得和牛B超好,病痛唔算多,而且一直都係有肉肉。

順帶祝天下間所有母親,母親節快樂,身體健康,開心快樂!


--------------------------------------------------
歡迎聯絡我&和牛B: chungying56@hotmail.com
Facebook專頁和牛B嘅成長專頁

Instagramwagyubmami


            
--------------------------------------------------
姊妹合作**Precious M accessories**
利用剩餘、過期的母乳,自己動手做屬於自己的首飾,母乳媽媽給自己的小獎勵,做法簡單自己都做得到。

沒有留言:

張貼留言