【特式餐廳】香港唯一一間兔子Cafe。親親小兔子。兔奴聚腳點
如果一直有睇我嘅文章，都會知道我係愛兔人士，喺生和牛B之前我有一隻兔仔養咗13年，但可惜兔兔佢敵不過歲月摧殘，喺和牛B出世前嘅一個月就離開咗我去咗彩虹橋做小天使。
你問我會唔會再養兔仔，我暫時都會答你唔養住，因為兔仔同貓、狗唔同。佢哋唔識得發聲，所以要照顧兔仔係要特別留心，留意佢哋嘅一舉一動。真係少啲愛、心機、時間都唔得呀。
**千祈唔好因為覺得佢哋好可愛、同埋臨近復活節而買佢哋返屋企，動物都有生命**
如果想詳細了解兔仔，大家可以上香港兔友協會(http://www.hkrabbit.org/)嘅網站，入面有好多關於兔仔嘅詳細資料。
而今次決定嚟呢間餐廳，首先係我自己好鍾意兔仔，我想嚟呢到好耐，而和牛B亦都好鍾意動物。其實我都考慮咗好耐，因為兔仔餐廳係有守則要遵守嘅，定立原因都係想保護兔仔啫。因為兔仔本身比較膽小，所以小朋友必須要控制情緒，唔好喺場入面尖叫、大嗌以及追逐兔仔，因為咁樣係會令到兔仔受驚。如果兔仔受驚嘅話，後果係可以好嚴重。
店長/ 職員都係愛兔之人，所以每台客人入座前，佢都會同客人再三叮囑，場內要保持安靜等等。愛護小動物及尊重店長，所以必須要留意及遵守餐廳嘅守則。入座前，客人亦都需要使用餐廳提供之消毒搓手液消毒雙手。
進入餐廳必須要穿上襪子，如果無嘅話，都可以同店長或職員購買($10/對)。
餐廳以和風居室設計，裝飾佈置都非常舒服。亦為咗方便親近兔仔，櫈仔都係貼地坐嘅，所以坐得耐可能會有少少唔舒服。
兔仔四圍走，當你專心食嘢嘅時候，可能突然會有隻兔仔走過你腳底~ 呢個時候，千祈唔好咁緊張，同即刻伸腳呀，咁樣係有機會會傷害到兔仔o架。
餐廳入面有15隻兔仔，但要留意客人只可以輕撫兔仔，係唔可以抱起兔仔o架。
每個兔籠/ 欄入面嘅兔仔，都會掛上佢嘅姓名牌、小資料。
而場內嘅兔仔仲會定時定候，分批出嚟散步同客人玩添。
所以兔仔係會四圍走o架，但記住千祈唔好追住佢哋呀，咁樣會嚇親兔仔o架。
店長兔 - 麵包Bread
和牛B第一次同兔仔咁親近，佢好溫柔咁輕撫兔仔。
餐廳入面嘅兔仔，各自都有佢哋嘅小天地。
悠閒地午睡中嘅兔仔們。
仲有就係大家千祈唔好將人類食物俾兔仔食呀，佢哋唔食得o架!!
如果想餵兔仔食草嘅話，可以同職員購買兔仔小食(草) (HKD18/份)
和牛B第一次餵兔仔，佢一啲都唔驚，而且好溫柔咁餵兔仔食。
食物方面
飲品同食物選擇都算多，有單點亦有套餐可以選擇。
不過就要留意返每個時段嘅最低消費。(留意文末)
我點咗一碟意粉，份量都多，我同和牛B一齊食都食唔晒。
蕃茄蜆肉意粉 (HKD68)
再點咗一份「大食拼盤」
大食拼盤 - 炸魚手指、麥樂雞、炸豬肉餃子、雞翼 (HKD68)
點咗一杯飲品
凍香甜朱古力 (HKD38)
而餐廳到處都會有兔仔嘅裝飾，仲有免費wifi服務提供。
收費方面
餐廳設有最低消費，星期一至五真係超抵，每人消費至少$50仲要無時限，你可以坐幾耐都得。
至於星期六、日及公眾假期，同樣每人最低消費$50，但就只限1小時，加鐘就每位$20/30分鐘，$30/60分鐘。如果假日每位點Combo Set，就不設時限。
而餐廳係不設加一服務費
＊＊溫韾提示＊＊
為愛護兔仔，請家長在旁指導小朋友要愛護小動物、及與兔仔相處嘅方式，以免傷害兔仔。
Rabbitland Cafe @ 銅鑼灣
電話：5281 0280 *請先預約
地址：香港銅鑼灣謝斐道530號3樓
--------------------------------------------------歡迎聯絡我&和牛B: chungying56@hotmail.comFacebook專頁: 和牛B嘅成長專頁
--------------------------------------------------
姊妹合作**Precious M accessories**
利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。
留言
發佈留言