【媽媽心聲】在職媽媽最想要的係假期? 豪食團? 旅行? 瞓覺?

作為在職媽媽嘅我，日常主要照顧和牛B嘅係婆婆。所以喺平日湊B方面，我花嘅力氣、心力比全職媽媽少好多。但唔同嘅係，返工要努力做好正職嘅工作崗位。每日收工就同全職媽媽一樣，照顧和牛B。

話雖如此，每日如是，公司放假我就會做返全職媽媽嘅工作崗位。即係話做媽媽，其實真係無假放嘅，全職媽媽就更加啦。全職媽媽所謂嘅無假，就係病咗都無得Call Sick，想放下大假、事假? 無啦，咩假都無呀。

咁你問我，如果捨得撇低個女，我最想係要邊樣野?

豪食一餐，食餐好嘅?

同朋友們去Gossip一下，食返餐??

去個短Trip?

其實對我嚟講，要撇低和牛B我真係唔想，所以只要和牛B夜晚肯乖乖地秒睡，而唔需要我每晚哄睡1-1.5小時，有得俾我早啲瞓覺及有覺好瞓，我已經好心滿意足了!!

要我撇低和牛B自己去旅行，我實在唔捨得同埋唔放心。因為每次公司放假，我都好期待同佢渡過，帶佢四圍去玩、多啲見識。所以要去旅行，我一定要預埋和牛B。

而食一餐好嘅，從去餐廳食嘢其實對和牛B嚟講都係一種體驗，所以我都好想同佢一齊去食餐好。

兩母女一齊食墨魚汁天使麵，食到棚牙同個咀都黑晒~都係一種好搞笑嘅體驗嚟。

有得瞓飽我已經開心到跳起啦~

--------------------------------------------------

歡迎聯絡我&和牛B: chungying56@hotmail.com
Facebook專頁: 和牛B嘅成長專頁

Instagram: wagyubmami

            
--------------------------------------------------

姊妹合作**Precious M accessories**

利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。