【熱話】搭Lift打尖,推BB車冇人讓。係自私?貪方便?別有原因?

以前未生BB,我都好少會喺地鐵/ 商場排隊爭Lift搭。因為我係健全嘅人,要行樓梯或者行遠少少都唔緊要。


到我生咗BB之後,我出街如果推BB車都需要搭Lift、搭地鐵。但我永遠發現一個情況就係,會有人同你爭Lift,好多睇落行動好正常嘅人,老人家我真係唔介意佢打我尖。但有啲後生嘅都會同你爭Lift,佢哋唔會覺得唔好意思。每次出街如果推BB車,都會浪費好多時間喺等Lift到。每當有Lift到嘅時候,你好禮讓咁企喺其中一邊,讓人出Lift嘅同時,另一邊就會有一堆人衝梗入Lift。到最後啲人出晒嚟,而部Lift就已經係Full晒。可能有啲人真係有隱疾而我唔知,但真心希望健全嘅人唔該行多兩步當做運動,唔好同有需要嘅人爭Lift搭啦。


至於搭地鐵,唔知大家會唔會有個感覺就係,你推BB車搭地鐵,啲人係擺出一副臭臉望住你。好似怪你好推架BB車入嚟霸晒啲位,呢個情況特別係繁忙時間。我試過喺放工時間見到有媽媽推住架BB車,佢一個媽媽帶住小朋友連BB車。但似乎佢永遠都無機會塞到上車,因為啲人永遠塞晒門口位,唔會行入車廂中間。

有時就算地鐵空檔檔都好,總有人會霸住擺BB車、輪椅位企。o個個位其實係俾輪椅人士泊好架車嘅安全位置嚟,好多時啲人都唔會讓返出嚟。


見到以上嘅情況,我當年唯有忍耐到和牛B可以用Hip Seat嘅時候。我外出都盡量用Hip Seat寧願自己攰啲,辛苦啲都唔想等好耐Lift同埋受氣。不過,用Hip Seat BB要瞓覺就無咁舒服…

而家和牛B大個咗,可以一齊搭扶手電梯方便咗好多。不過,我仍然好怕同和牛B迫地鐵、迫Lift。


--------------------------------------------------
歡迎聯絡我&和牛B: chungying56@hotmail.com
Facebook專頁和牛B嘅成長專頁

Instagramwagyubmami


            
--------------------------------------------------
姊妹合作**Precious M accessories**
利用剩餘、過期的母乳,自己動手做屬於自己的首飾,母乳媽媽給自己的小獎勵,做法簡單自己都做得到。

留言

此網誌的熱門文章

【濕疹! 真心推薦】CUBED 無藥性、真正止痕、有效之濕疹修理產品 | 文末優惠碼

【召集! 角落生物Fans】必去! 期間限定《角落小夥伴》打卡主題餐廳 | 附book台小貼士

【餐廳推介】超人氣! 日式一人定食燒肉$48起一份