【聖誕DIY】自己動手做小寶寶專屬的聖誕裝飾

話咁快又到十二月，十二月大家都一定好忙，好忙咁買聖誕禮物、好忙咁佈置聖誕樹、工作都好忙。

今年因為我哋準備要搬，所以屋企無乜氣氛，聖誕樹又掉咗，上年用過嘅聖誕裝飾又Pack晒入箱，所以我屋企真係冇乜氣氛嘅。雖然佈置唔到屋企，但我仲可以幫手佈置娘家、同埋公司。

我發現當我生咗和牛B之後，屋企溫暖咗好多、氣氛融洽咗好多。因為屋企多咗好多家庭相，笑聲又多咗。

今年我決定搞搞新意思，自己動手整聖誕裝飾品。材料工具都好簡單，都係剪紙、拼貼。

而今次教大家做嘅小手工，可以一物多用，可以掛喺聖誕樹、掛牌、吊旗，仲可以當小小心意咭送俾朋友。

準備工具：

1.打印好嘅人物

2.厚咭紙/ 紙皮

3.金粉膠水

4.打窿機

5.交剪

6.線/ 繩/ 絲帶

7.雙面膠紙

8.博士貼/ 封箱膠紙 - 作為(1)嘅保護面

做法 :

1. 首先將自己完成好嘅人物圖案印出嚟，再用封箱膠紙/ 博士貼貼於表面作一層保護。

2. 然後修剪好形狀，再利用雙面膠紙貼於厚咭紙/ 紙皮上面。再剪/ 界出嚟。

▲ 然後利用打窿機喺頂部位置打個窿。

▲ 再穿上繩/線/絲帶，長度可隨自己喜好而家。

▲ 完成啦

見到咁多個和牛B，覺得好興奮，佢哋好似開Party咁。

可以將佢哋掛起，一樣好開心。

掛上聖誕樹都一樣好有氣氛。

**小貼士**

喺製作上點解我用雙面膠紙而唔用膠水/ 漿糊筆呢? 原來係因為漿糊筆黏力未必夠好，而用膠水嘅話好容易會令到人物圖案嘅紙出現起泡/ 皺嘅情況。

至於保護膠貼方面，其實係可以過膠都得嘅，但如果屋企無過膠機，要拎出去俾人過膠嘅話，過一張嘅價錢都唔平呢。

設計圖方面，我自己係用Photoshop去製作嘅，如果大家冇Photoshop，大家可以Download下面呢個Apps，之後Save低再打印出嚟。不過就冇咁Q版~但都可以有自己想要嘅圖像。

--------------------------------------------------歡迎聯絡我&和牛B: chungying56@hotmail.comFacebook專頁: 和牛B嘅成長專頁
Instagram: wagyubmami

            
--------------------------------------------------

姊妹合作**Precious M accessories**

利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。