【聖誕新年好去處】AIA 歐陸嘉年華。大人細路都啱玩
每年我總會去一、兩次，就算無免費飛都會忍唔住入場玩。原因好簡單，氣氛好好，好熱鬧，除咗有好多刺激機動遊戲之外，仲有超多攤位遊戲。唔好話啱一家大細，拍拖、同一大班朋友嚟都一樣啱玩！ 事不而遲，馬上去片啦！ 地點一如以往，都係喺中環海濱，地方夠大！ 入場費: 成人（12歲+）$130 - 包括10個代幣 小童（3-11歲）$90 - 包括7個代幣 *除網上訂票外，亦設有即場售票(現金、信用卡) 如果喺場內玩到無晒代幣嘅話，場內有多部兌換代幣機㗎。 小朋友方面，今年好似多咗好多機動遊戲。歷年嚟都有嘅旋轉滑梯、旋轉木馬、車類嘅機動遊戲、波波池區、大型充氣彈床、旋轉小火車、反斗車王麥坤、獨木舟。 有兒童版飛天千秋、直升機、碰碰車等。 不過留意，部份遊戲都設有小童身高限制嘅。 仲有每年必有夾公仔機。 大型攤位遊戲，獎品好吸引，有Winnie the Pooh公仔、Minions、Marvel系列、Peppa Pig公仔等。 講到有Peppa Pig，我哋當然落足力去玩，結果用咗12個代幣贏咗1個細獎，2個中獎返嚟。 另外一定介紹，近入口附近小朋友可以揸住架Tesla飛車，如果唔夠1米高玩唔到嘅話，唯有喺隔離影返張相留念啦。 至於成人啱玩嘅刺激機動遊戲，當然唔少得啦，AIA歐陸嘉年華歷年嚟都會引入唔少超刺激機動遊戲，360度左轉右轉，左fing右fing，睇見都想尖叫呀，亦係最吸引、唔敢玩都一定會睇下！ 場內仲有嘉年華嘅精品店添呀。 玩到餓，仲有唔少美食選擇添喎。 影相位 場內隨處都會見到好多影相位、人板、公仔乜都有呀。 ...