和牛B 的成長日記

大概由妹妹2歲多，我就發現妹妹有間歇外斜視問題，當時由健康院檢查後，轉介眼科醫院跟進。至今妹妹已5歲，眼科醫院亦已跟進大概已經2-3年了，眼見妹妹間歇外斜視問題，亦無大改善。 眼科醫生就建議可以做手術去改善問題，醫生亦有提及斜視本身並唔會影響視力，但會影響外觀 (自信問題)，仲會影響立體感，而某些工作如果欠缺立體感係未能擔任，如: 飛機師。  醫生亦有同我哋提及手術成功率，成功率高。但少部份唔成功的話又會有咩情況出現 (如: 由外斜視變成鬥雞眼)，另外隨住時間眼部肌肉亦會有鬆弛回復斜視情況等。 此外，由於年紀細，手術需全身麻醉去進行。 家長要自行決定冒唔冒險去做，做手術風險一定有。 而我哋我哋最終決定做手術幫妹妹改善問題，等妹妹會有自信及立體感問題。 手術前，需再約見眼科醫生及麻醉科醫生進行詳細健康評估及簽署手術同意書。 (當日必須帶備小朋友出世紙證明書正本) 由於屬簡單手術，所以手術完成後都係可以即日出院，無需留院。 重點! 手術前數天如果有身體不適，如: 發燒、傷風、感冒，就需要聯絡醫院改期進行手術。 當日手術流程: 前一晚12時開始禁食，期間只能飲少量清水。 到達醫院，登記後，會量體溫、量血壓。姑娘會再跟我哋再次詢問健康狀況，有沒有藥物、食物敏感問題及同意書簽名。稍後再與麻醉科醫生再一次核實健康狀況，有沒有藥物、食物敏感問題及同意書簽名。 最後眼科醫生會再檢查一次眼鏡、量度斜視角度及再核實一次健康狀況，有沒有藥物、食物敏感問題及同意書簽名。 整個過程，醫生、護士都好有耐性、細心。 護士仲好溫柔同妹妹講，一陣會俾啲香味佢聞，叫佢自己揀味道。 手術前半小時左右，護士就幫妹妹雙手手背塗上麻醉膏，方便打痘是唔覺得痛。 妹妹非常緊張，擔心同驚，但係佢好叻女。 終於進入手術室啦，幾個護士都好有耐性、溫柔同妹妹傾計，分散佢注意力唔好睇住打痘。 又雖然搽咗麻醉膏，但妹妹都感覺到有少少痛，但佢冇喊，只係同咗我講「媽咪，我隻手有啲痛...」然後，轉眼麻醉科醫生，就叫妹妹戴住罩吹波波，幾十秒後，妹妹就閉上眼瞓咗啦!! 而我就跟住護士離開手術室，等候妹妹完成手術! 當時護士話手術大概1小時就會完成，但實除上妹妹大概30分鐘多少少就完成咗!! 妹妹麻醉藥力未過，所以仍然睡著。 眼睛明顯見到，有一層厚厚嘅Gel喺眼到，其實係止痛藥膏。 妹妹清醒後，佢眼睛因為止痛膏黏住，所以打唔開...